Қазіргі жаһандану дәуірінде білім мен ғылымды біріктірудің маңызы арта түсуде. Бұл үрдіс Қазақстанның жетекші жоғары оқу орындарының бірі әл-Фараби атындағы Қазақ ұлттық университетінің (ҚазҰУ) негізгі миссиясымен тығыз байланысты. Университет тек қана білім беру ордасы ғана емес, ғылыми инновациялар орталығы ретінде елдің интеллектуалдық әлеуетін нығайтып келеді.
ҚазҰУ-дың басты ұстанымы – білім беру үдерісін ғылыми зерттеулермен ұштастыру. Мұнда студенттер тек теориялық біліммен шектелмей, практикалық дағдыларды игеріп, ғылым саласындағы жаңа мүмкіндіктерді зерттеуге мүмкіндік алады. Университет қабырғасында білім алған студенттер еліміздің экономикалық, әлеуметтік және мәдени дамуына үлес қосатын, әлемдік стандарттарға сай маман болып қалыптасуда.
Университеттің ғылыми-зерттеу орталықтары мен зертханалары жаңа технологияларды игеруге және өзекті ғылыми мәселелерді шешуге бағытталған. ҚазҰУ ғалымдары халықаралық деңгейдегі зерттеулерге қатысып, маңызды ғылыми жаңалықтар ашуда.
Әл-Фараби есімін иеленген университет оның «кемел адам» тұжырымдамасын басты құндылық ретінде ұстанады. Бұл тұжырым білім, ғылым, рухани-адамгершілік құндылықтарды үйлестіре отырып, жеке тұлғаның жан-жақты дамуын көздейді. ҚазҰУ-дың миссиясы осы ұстанымға негізделіп, қоғамның игілігі үшін жаңа буын көшбасшыларын тәрбиелеуді мақсат етеді.
ҚазҰУ ғылыми экожүйені дамытуда жетекші рөл атқарады. Университеттің технопаркі, инновациялық кластерлері және стартап жобалары ғылымды нақты өндіріске енгізуге бағытталған. Әсіресе жас ғалымдар мен студенттердің стартап жобаларына ерекше назар аударылып, қолдау көрсетіледі. Сонымен қатар, ҚазҰУ халықаралық ынтымақтастықты нығайту арқылы ғылыми зерттеулердің деңгейін жаңа сатыға көтеруде. Университет әлемнің жетекші оқу орындарымен және зерттеу орталықтарымен серіктестік орнатып, білім беру мен ғылым саласында тәжірибе алмасуда.
ҚазҰУ-дың білім мен ғылымды біріктіру миссиясы – ел болашағына салынған маңызды инвестиция. Университет түлектері – Қазақстанның ғана емес, әлемнің әр түкпірінде табысты еңбек етіп жүрген мамандар. Олар білім мен ғылымның үздік дәстүрлерін сақтап қана қоймай, оны жаңа биіктерге көтеруге үлес қосуда. Әл-Фараби атындағы ҚазҰУ – білім мен ғылымның біртұтастығын қамтамасыз етіп, жаңа заман талаптарына бейімделген, шығармашылық пен инновацияға негізделген оқу орны. Бұл университеттің басты миссиясы – заманауи қоғамның сұраныстарын қанағаттандырумен қатар, ғылым мен білімнің шексіз әлеуетін ашу.
Авакова Р.А., Филология ғылымдарының докторы, профессор.
Утемгалиева Н.А., PhD, доцент м.а.
Болатбек С., PhD студенті
