Ия, біз – тарих пен тағдырдың ауыр соққысы мен ғасырларға созылған ұзақ уақыттағы қиыншылықтардың барлығын басымыздан өткеріп, көріп келген елміз. Біздің қазақ халқы өте төзімді, шыдамды, қайсар, батыр, ер халық деп ойлаймын. Себебі, тарих беттерін парақтап қарасам, қатыгез толқындар біржолата жойып жіберетіндей азапты жылдарда тарыдай шашырап кетсе де, қазақ халқы қабырғасы қайыспай, аман қалып отырыпты. Осындай тарихи оқиғалардың куәгері болған біздің бабаларымыз нағыз мәртебеге лайық, олар біз үшін патриоттықтың, батырлықтың үлгісін көрсетті.\r\n\r\n«Өткенімізді ұмытсақ, болашақ бізді кешірмейді» демекші бүгінгі таңда тәуелсіз елім Қазақ хандығының құрылғандығына 550 жыл толуына орай тарихи жадымызды жаңғырту мақсатында түрлі іс-шараларды қуана-қуана өткізіп жатыр. Осыдан 550 жыл бұрын, яғни бұдан бес жарым ғасыр бұрын қазақтың Қозыбасы деген жерінде қазақтың маңдайына біткен ержүрек ерлеріміз Керей мен Жәнібектің бастамасымен Қазақ хандығы құрылды. Бұл ұлы хандық қазақ халқының өз алдына діні бар, тілі бар, халқы бар тұтас бір ел екенін көрсетті. Хандық күшейген сайын халықтың саны артып, жер көлемі де ұлғая бастады. Ұлы хандықтың қалыптасу жолында түбегейлі өзгерістерге ұшырап, елеулі оқиғаларды басынан өткерді. Ұлы дала мемлекетінің ірге тасы мықтап қалануына Абылай мен Әбілқайыр хандарымыз, Қабанбай, Бөгенбай, Наурызбай сынды батырларымыздың ерен ерліктері тарих сахынасында алтын әріптермен қалды. Ал біз үшін бабаларымыздың әрбір жүріп өткен даңғыл жолы ұрпаққа үлгі, шежіреге толы, тағдыры-тарих деп есептеймін.\r\n\r\nТуымызда бейнеленген қыран құстай еркіндікті аңсаған азат халқымның тәуелсіз ел болғанына биыл 24 жыл толды. Бұл күнде Мәңгілік ел – Қазақ елі тәуелсіз мемлекет ретінде әлемге әйгілі болды. Ал ата-бабамыздың туған жері болашаққа, яғни бізге қалдырған аманаты, мұрасы емес пе?! Менің елім мол табиғат байлығымен ғана емес, ең алдымен бейбітшілігімен бай да байқуатты ел. Осындай ғұламадай елімді, жерімді шексіз сүйемін, туған атамекеніме адал еңбек етемін деп нық басып айта аламын.\r\n\r\nМен осындай батырлардың, ақындардың, даналардың ұрпағы болғанына қуанамын. Қазақ баласы болып дүниеге келгендіктен өз жерімнің тарихын білуге міндеттімін деп есептеймін. Мен ғана емес, әрбір қазақ баласы өз ұлтымен, өзінің төл тарихымен мақтана алуы қажет. Ол үшін біз үзбей білімімізді жетілдіріп, биікке ұмтылуымыз керек. Оның куәсі ретінде мен оқитын Шәкәрім атындағы облыстық дарынды балаларға арналған үш тілде оқытатын мамандандырылған мектептің бірнеше пәндері ағылшын тілінде жүргізіледі. Жас қанатымыздың қатаюына, талапты талпынысымызға жол ашып, сапалы білім, саналы тәрбие беріп отырған өз мектебіммен шын жүрегіммен мақтанамын. Ата-бабам аңсаған Қазақстанның тәуелсіздігінің тамырын тереңдететін, көк туын биікке желбірететін, Қазақ елінің – Мәңгілік елге айналуына барын салатын болашақ азат ойлы, алып ұландары болуға біз бар күшімізді саламыз. Сөз соңында айтарым, көк күмбезді аспаны бар, бетегелі боз даламызды біз ешкімге ешқашан бермейміз.\r\n\r\nМенің бала жүрегім соған кәміл сенеді!\r\n\r\n \r\n\r\nЖұртыбекова Шырын Батырбекқызы\r\n\r\nШәкәрім атындағы облыстық дарынды балаларға арналған үш тілде оқытатын мамандандырылған мектептің 5-сынып оқушысы
