Тақырыбы: Достық
Мақсаты: Қазақстанда мекендейтін ұлт өкілдерінің бәріне достық қарым-қатынасқа, өз халқына, еліне деген сүйіспеншілік, мақтаныш сезіміне тәрбиелеу. Адамгершілік жақсы қасиеттерге: достыққа, татулыққа, қамқорлыққа, сыйластыққа, қайырымдылыққа, бауырмал болып өсуге баулу.
Көрнекіліктер: Нақыл сөздер, ұран сөздер, мақал-мәтелдер, өлең жолдары, буклет, ұлт өкілдерінің суреттері, шарлар, суреттер көрмесі
Барысы:
Балалар әдемі әуен ырғағымен залға кіріп, шеңбер бойымен сапқа тұрып, жалаушалармен жаттығу орындайды.
Мұғалім: — Сәлеметсіздер ме, құрметті қонақтар! Бүгінгі «Достық» тақырыбына арналған ертеңгілігімізді ашық деп жариялаймыз!
«Біз өмірдің гүліміз» әні орындалады. (Ақгүл, Шынар, Жоламан)
Осы кезде Алдар Көсе келеді.
Алдар Көсе:
— Сәлеметсіңдер ме, балалар! Сендерде бүгін ертеңгілік болып жатыр деп естіп, соған әдейілеп сендерге сұрақ қойғалы келдім.
— Балалар, сендер қандай Республикада тұрасыңдар?
— Елордамыз қай қала?
— Президентіміз кім?
— Нышандарды кім атап бере алады? (Балалардың жауабы)
Мұғалім:
— Құрметті Алдар Көсе, біздің балаларымыз білімді ғана емес, өнерлі де, сізде бізбен өнерлерін тамашалаңыз.
— Балалар! Әр елде сол елдің негізгі халқы белгілі бір ұлт тұрады, ал біздің Қазақстанның негізгі халқы да , қожасы да – қазақ халқы. Ана тілі – қазақ тілі. Мемлекеттік тілімізде – қазақ тілі. Сендердің болашақтарың айқын бақытты болмақ. Оған кепіл Қазақстандағы халықтар достығы. Қазақстанда 150-ден астам ұлттар мен ұлыстардың өкілдері тұрады. Олар: қазақтар, орыстар, татарлар, ұйғырлар, немістер, шешендер, т.б. Әр халықтың өз салт-дәстүрі, әдет-ғұрпы,
тілі, діні бар. Бір шаңырақ астында өмір сүріп жатқан барлық ұлттарды бір-ақ нәрсе біріктіреді – Отанға деген сүйіспеншілік. Келесі кезекті оқушыларға береміз.
Рүстем: Анамыздай тілеуі ақ,
Отан – бізде біреу-ақ!
Ол біздің Қазақстан!
Алтай-Жайық арасы –
Жарты әлемдей даласы
Ол біздің Қазақстан!
Шынар: Кенге толы қойнауы,
Төлге толы жайлауы
Ол біздің Қазақстан!
Жастан сүйіп кәусар ән
Тәтті күйді аңсаған
Ол біздің Қазақстан!
Бибінұр: Нышандарым елдігімнің белгісі
Білу керек баладағы ең кіші
Нышандарым әнұран, ту, елтаңба
Нышандарды жатқа білген жөн.
Ақгүл: Зеңгір аспан көгілдір,
Алтын күні төрінде
Тамылжытып төгіп тұр,
Шаттық сыйлар көңілге.
Күлдиша: Көк аспанда көгілдір,
Алтын күні төрінде
Тамылжытып төгіп тұр,
Шаттық сыйлар көңілге.
Жоламан: Көк байрақтың бетінде
Қыран бүркіт қанатты
Сол қырандай еркіндеп
Бала өседі талапты.
Бибінұр: Ақ, қарамыз, сарымыз –
Тату, доспыз, бәріміз
Достық жайлы ән салып,
Шырқатайық, кәне, біз!
Ирина: Сары, ақпыз, қарамыз
Бәріміз де баламыз
Бір ауылда тұрамыз
Бір мектепке барамыз.
Аяулым: Ақ, қара деп бөлмейміз
Бір жыл туған төлдейміз.
Туысқанбыз татумыз,
Биіктерге өрлейміз.
Ляйля: Біз – балдырған тең басқан
Дос құшағын елге ашқан
Тілегіміз – бейбіт күн
Ашық болсын кең аспан.
Дамир: Жақсылыққа, бақытқа,
Талпынған әр уақытта
Бала біткен дос бауыр
Болмасын еш тосқауыл.
Ақгүл: Біз тілейміз бар бөбек
Бақытты өмір сүргенін
Туған елге еркелеп,
Қуанғанын күлгенін.
Күлдиша: Сусынымыз қанады
Өнер білім нәрімен
Әлемдегі баланың
Дос боламыз бәрімен.
Айжан: Нұрға бөлеп әлемді,
Атты мамыр ақ таңы
Қуандырды әр елді
Күннің шырақ жаққаны.
Ақнұр: Арайлы таң күнінен
Төгіліп тұр күн бүгін
Құттықтайды ел бір-бірін,
Бейбіт көктем гүлімен.
Ерлан: Жүзімізге қараңыз
Бал күлкілі баламыз.
Бізге қымбат күншуақ
Бізге қымбат анамыз.
Рүстем: Бұл құшағы тым ыстық
Мектебіміз бастапқы!
Бұнда тұңғыш туыстық,
Бұнда тұңғыш дос таптық!
Жоламан: Бұл екінші үйіміз
Бір туғанбыз бәріміз
Біз – осы үйдің гүліміз,
Біз – осы үйдің сәніміз.
Жұпар: Ән саламыз күнде біз
Қыздырынып күнге біз
Балдай тәтті достармыз,
Біз қашанда біргеміз.
Шынар: Сәбилердің зәресін бұлт алмасын,
Гүл-бәйшешек еш уақытта солмасын.
Ақ көгершін аспанымда қалықтап,
Барлық халық бейбіт күнді қолдасын!
Ән «Әрқашан күн сөнбесін» (хормен)
Хормен: Мықты болса іргеміз,
Бәрімізде біргеміз
Сонда құт пен береке
(Шеңберге тұрып, аттарын атау)
Біз достармыз, достармыз! (Қолдарынан ұстау)
— Балалар, сендер бір-бірлеріңнің қолдарыңның жылуын сезіндіңдер ме, ендеше сол жылуымызбен қонақтарымызбен де бөлісейік. (алақан үрлеу)
— «Дос болсаң берік бол, досыңа серік бол», — деп халқымыз айтқандай, келесі кезекті көрініске береміз. Көрініс «Екі дос» (Рүстем, Жоламан,Шынар, Ерлан)
— «Аста – тұз,
Адамда – дос тәтті» деген даналардан қалған сөз бар екен, балалар. Ендеше дос туралы, жақсылық-жамандық туралы мақал-мәтелдер айталық.
(Мақал-мәтел айтысы)
— «Бірлік болмай, тірлік болмас.» (Күлдиша)
— «Бір дос көлеңке
Басыңды күн шалса
Іздеп таба алмайсың.» (Шынар)
— «Досыңның көзінде болғанша,
көңілінде бол.» (Айжан)
— «Досы көппен сыйлас,
Досы азбан сырлас.» (Жоламан)
— «Жаман аттан аяғым артық,
Жаман жолдастан таяғым артық.» (Рүстем)
«Дос көпті жау алмайды,
Ақылы көпті дау алмайды.» (Бибінұр)
— «Жүз сом ақшаң болғанша,
Жүз досың болсын.» (Ақнұр)
— «Жолдасы жаманды жау алар.» (Ерлан)
— «Дос жылатып айтады,
Дұшпан күлдіріп айтады.» (Жұпар)
— «Жақсы адамда – жаттық жоқ.» (Ақгүл)
— «Күлме досқа, келер басқа.» (Ирина)
Мұғалім: Ойым бар бір ойын бастамақ,
Аты оның «Сақина тастамақ»
Шеңбер болып отыра қалыңдар,
Болмасын асығу, аптығу.
Қазақтың ұлттық ойыны «Сақина тастамақ».
Хормен: — Толысып өскен санамыз,
Көңілді біз баламыз.
Шығарған өз халқымыз,
Шырқап әнге саламыз.
Ән «Айгөлек» (Хормен орындау)
Мұғалім: — Бишімізде өнер көп,
Би билейді мәнерлеп,
Қазақтың биін көріңдер,
Айжан қыз билеп береді. (Қазақ биі)
«Бала тілі – бал» Көрініс «Әжесі мен немерелері»
Қорытындылау Мұғалім: — Балалар, аспанда не ыстық?
Хормен: Аспанда күн ыстық.
Мұғалім: -Ал жерде кім ыстық?
Хормен: Әке мен шешеміз,
Сүйікті тым ыстық.
Жасасын туыстық,
Достық пен тыныштық!
— Балалар, «Өнерлі бала сүйкімді» дегендей сендер бүгін өз өнерлеріңді көрсете білдіңдер. Және де «Ақылды бала іс тындырар, ақылсыз бала тіс сындырар» — демекші келешекте ақылды, өнерпаз болып ер жетіп, көп еңбек етіңдер. Мына өлең жолдарын сендерге арнаймын:
Ұландарым бұтақтарым, бүрлерімсің.
Қыздарым мәуелерім гүлдерімсің.
Жақсы болсаң жап-жарық күндерімсің,
Жаман болсаң қап-қара түндерімсің. соңы
Ғ. Мүсірепов атындағы орта мектебі
Динбаева Алуа Кабидулловна
МЕКТЕПАЛДЫ ДАЙЫНДЫҚ СЫНЫП
