Сарыарқа, Арқа — Қазақстанның бүкіл орталық бөлігін алып жатқан аймақ. Қарағанды, Ақмола облыстарын толығымен, Шығыс Қазақстан облысының басым бөлігін, Павлодар, Қостанай облыстарының біраз жерін қамтиды.
«Сарыарқа» атауының мағынасы «ұлан-байтақ қыратты» жазық дала дегенді блдіреді. Сарыарқаның жер бедері аласа оқшау таулар, төбелер, қырқалар мен шоқырлардан тұрады.
Сарыарқаның ең ірі өзендері — Есіл, Нұра, Сарысу, Сілеті, Шідерті, Аягөз. Орталық Қазақстанның елді мекендері мен өндіріс орындарын сумен жабдықтау және жер суаруға пайдалану үшін Ертіс-Қарағанды каналы жүргізілген.
Ең ірі көлі — Қорғалжың ойысындағы Теңіз көлі. Көкшетау, Нияз, Баянаула, Қарқаралы тауларында қайыңды-қарағайлы орман өседі.
Сарыарқаның далалы жерлерінде жыртқыштардан: қасқыр, түлкі, қарсақ, дала күзені кездеседі. Құстардан — бозтоғай, тырна, құтан, әупілдек, су құстарынан — үйрек, сұр қаз, аққу, қоқиқаз мекендейді. Қарағайлы — қайыңды ормандарында бұлан, елік, т.б, Ерментау, Қарқаралы, қызыларай, Ұлытау тауларында арқар кездеседі.
Сарыарқаның қойнауында кен байлықтары мол: хром, никель, титан, мыс, қорғасын, алтын, күміс, темір, марганец, қалайы кендері шоғырланған.
Сарыарқаның табиғатын қорғау мақсатында Баянаула, Көкшетау, Қарқаралы ұлттық табиғи саябақтары, Қорғалжың қорығы және басқа да кішігірім қорықшалар ұйымдастырылған.
«Сен білесің бе?» энциклопедиясы. Құрастырған: Райымбеков Қ.Ж, Байғабылова Қ.Т
